كيف تراجعوا فيديوكم مع Gemini قبل النشر

خلّوا Gemini يشوف الفيديو كامل ويعطيكم ملاحظات قابلة للتنفيذ قبل ما تنشروه.

الفكرة هون مش إنكم تبعتوا الإسكريبت أو لقطات منفصلة. ارفعوا ملف الفيديو داخل Notebook جديد، وخلوه يراجع التسجيل مع الصوت والمونتاج وتفاصيل الشاشة. بعدها خذوا الملاحظات المفيدة وعدّلوا النسخة قبل النشر. التقييم بساعدكم بالمراجعة، بس مش ضمان للانتشار.

قبل ما تبدأوا

• •جهّزوا نسخة الفيديو اللي بدكم تراجعوها.
• •افتحوا Notebook جديد داخل Gemini.
• •اختاروا إذا بدكم تلصقوا البرومبت مع كل فيديو، أو تحفظوه مرة واحدة كـ Agent instructions داخل النوتبوك.
• •خلّوا النسخة المعدّلة جاهزة إذا بدكم تعيدوا الفحص بعد التعديل.

الخطوة 1: افتحوا Notebook جديد وارفعوا الفيديو

افتحوا نوتبوك جديد داخل Gemini وارفعوا ملف الفيديو اللي بدكم تراجعوه. استنوا لحد ما يظهر كمعاينة داخل المحادثة. لا تختصروا التجربة بإرسال الإسكريبت لحاله، لأن المطلوب هون مراجعة الفيديو مع الصوت والمونتاج وتسجيل الشاشة.

الخطوة 2: اختاروا وين تحطوا برومبت المراجعة

عندكم طريقتين:

• •كل مرة: بعد ما ترفعوا الفيديو، الصقوا البرومبت الكامل بالمحادثة وابعتوه. هاي أسرع طريقة إذا بدكم تجربة سريعة أو تعليمات مختلفة لكل فيديو.
• •مرة واحدة للنوتبوك: بعد ما تنشئوا النوتبوك، اضغطوا على الثلاث نقاط بأعلى اليمين، اختاروا Settings، وبعدها الصقوا البرومبت داخل Agent instructions. هيك Gemini يستخدم نفس قواعد المراجعة بكل جلسة داخل هاد النوتبوك، وما بتحتاجوا تلصقوا النص من جديد كل مرة.

ومن تجربتي الشخصية واختباري للميزة، بنصح كمان تطفوا Memory لهالنوتبوك. الهدف إن كل مراجعة تعتمد على الفيديو والتعليمات الحالية، وما تدخل ذكريات أو سياق قديم على التقييم. هاي توصية شخصية، مش شرط إجباري، وإذا احتجتوا سياق مستمر بين الفيديوهات بتقدروا تتركوه شغّال.

برومبت المراجعة الجاهز

هاد إصدار منقّح من البرومبت المستخدم: حافظت على التحليل الصارم، التوقيتات، الـscorecard، وخطة المونتاج، وشلت منه إعدادات كانت مرتبطة بنظام مونتاج خاص حتى يشتغل مع أي محرر أو editing agent. اضغطوا انسخ البرومبت كامل والصقوه بالمحادثة أو داخل Agent instructions.

الخطوة 3: خلّوا Gemini يراجع الفيديو كامل

بعد رفع الفيديو وإضافة البرومبت، ابعتوا طلب واضح مثل:

Review the attached video using the instructions above.

خلو التحليل يخلص. المطلوب ملاحظات مرتبطة بتوقيتات واضحة وقرارات يقدر المحرر ينفذها، مش كلام عام مثل «خلّوه أسرع» أو وعد إنه الفيديو رح ينتشر.

الخطوة 4: تأكدوا إنه راجع الفيديو نفسه

إذا بدكم تتأكدوا إنه اعتمد على الفيديو الكامل، اسألوه:

Did you review the entire video with playback and audio, or only inspect screenshots? State any limits clearly.

في التجربة، الرد قال إنه راجع الفيديو كامل مع الـplayback والصوت، وذكر كمان التنقّل بين الوجه وتسجيل الشاشة وتفاصيل الواجهة. افحصوا الرد نفسه، ولا تعتبروا مجرد وجود نص طويل دليل كافي.

الخطوة 5: راجعوا التقرير قبل ما تنفذوه

التقرير لازم يفصل بين اللي شافه فعلاً، واللي استنتجه، واللي ما قدر يتأكد منه. ركزوا على الاقتراحات المرتبطة بتوقيت أو جملة أو حركة ظاهرة، وارفضوا أي clip IDs أو لقطات أو نتائج اخترعها من عنده.

التقرير ممكن يعرض ملاحظات على الـhook، وضوح المشهد، تسلسل الفكرة، سرعة الإيقاع، الـproof، والـpayoff. هاي الفئات بتعطيكم قائمة عملية للمراجعة قبل النشر.

الخطوة 6: عدّلوا الفيديو وأعيدوا التقييم

خذوا الملاحظات اللي بتشوفوا إنها مفيدة، عدّلوا الفيديو، وبعدها ارفعوا النسخة الجديدة للنوتبوك نفسه واطلبوا تقييم ثاني. قارنوا المشاكل المحددة بين النسختين، مش بس الرقم النهائي.

إذا ما زبط

إذا ردّ إنه اعتمد على screenshots أو ما قدر يوصف الصوت والـplayback، تأكدوا إنكم رفعتوا ملف الفيديو كامل وانتظروا لحد ما يخلص التحليل، وبعدها أعيدوا سؤال التحقق. وإذا التعليمات طويلة وما التزم فيها، افتحوا مراجعة جديدة داخل نفس النوتبوك وتأكدوا إن Agent instructions محفوظة.

التقييم بساعدكم تلتقطوا مشاكل قبل النشر، بس مش ضمان إن الفيديو رح ينتشر. استخدموه كمراجع إضافي، وخلو القرار النهائي عندكم.